Малум тирвал, эхиримжи йисара чи уьлкведин руководстводи чпихъ алакьунар авай аялар жагъурун ва майдандиз акъудун патал са макьсаддихъ рекье тунвай еке кIвалах тухузва. И кардик гьакI об- щественный тешкилатри, кьилдин ксари – меценатри чпин пайни ку- тазва. И жигьетдай сифте нубатда чаз гьар йисуз лезги районрин школайрай математикадай алакьунар авай аялрин олимпиада кьи- ле тухузвай ва тафаватлу хьайибур руьгьдин жигьетдай ашкъиламишзавай чи баркаллу районэгьли технический илимрин доктор Абдул Баламирзоеван тIвареке гьуьрметдивди кьаз кIанзава. Шад жедай кар ам я хьи, алай йисан ноябрдин вацралай, Махач- къалада кардик квай «Умуд» («На- дежда») алава образованидин цен- трдин къаюмвилик кваз, чи райондин образованидин управленидин патав райондин школайрин 5-6 – классра кIелзавай ва чпихъ математикадай кьетIен алакьунар авай аялар патал математикадин кружок кардик акатнава. Гьар гьяд юкъуз пакаман сятдин 10-далай сятдин садан зуралди кьиле физ- вай адаз регьбервал ЦIийи Испикрин юкьван школадин математикадин тежрибаллу муаллим Шерифов Мегьамедиграм Айдемировича гузва. Куьруь баян: М.А. Шерифова 1976-йисуз ДГУ-дин математический факультет яру дипломдалди акьалтIарна. А йисалай инихъ, 40 йисуз, Испикрин юкьван школада математикадин муаллим яз кIвалахзава. 2002 – йисалай инихъ кьилин категориядин муаллим я. 2008 – йисуз кьиле фейи «Мате- матикадай Россиядин лап хъсан муаллим» конкурсда гъалиб хьайи адаз РФ-дин Президентдин грант, РФ-дин образованидин ва илимдин министерстводин Гьуьрметдин грамота, 2009-йисуз «РФ-дин умуми образованидин лайихлу работник» лагьай гьуьрметдин тIварни ганва. Ада тарсар гузвай аялрикай 2 касди математикадай кьиле тухвай Чебышеван тIварунихъ галай зо- нальный олимпиадада 2 ва 3 – чкаяр кьуна. Алай йисуз математика- дай кьиле фейи райондин олимпиадада лагьайтIа, Айдемир Шери- фова (6-класс) 1- чка, Жамиля Гьасановади (7-класс) 2-чка, Амрулагь Бабаева (9-класс) 3- призовой чка кьунва. Мадни са кар къейд ийиз кIанзава: вичин чIехи бубайрин баркаллу кар (хъенчIин къапар гьа- зурун) давамаруналди, ада райондин аялрин яратмишунрин КIвалин патав тешкилнвай аялриз хъенчIин къапар гьазуриз чирзавай кружокризни регьбервал гузва. Алатай гьяд юкъуз, райондин кьилин тапшуругъдалди, чун М.А.- Шерифова регьбервал гузвай вич Кьасумхуьруьн 1-нумрадин юкьван школада кардик кутунвай математикадин кружокдин кIвалахдихъ галаз мукьувай таниш хьана. Кружокда райондин гьар хуьрерин (ЦIийи поселок, Испик, Вини-СтIал, НуьцIуьгъар, Кьасум- хуьр, Агъа-СтIал ва мсб.) мектебрин 5-6 – классра кIелзавай 17 аялди чпин чирвилер хкажзава. 2-3 сятда кьван давам жезвай чирвилер гунин кIвалахдин вахтунда, сифте кIвализ гайи тапшуругъар веревирд авурдалай кьу- лухъ, кьилин фикир алатай йисарин олимпиадайрин тапшуругъар (задачаяр) гьялуниз, аялрин чпин активвал хкажуниз гузвай. Ачух къайдада кьиле физвай тарсара аялри задачаяр гьялунин жуьреба-жуьре вариантар теклифиз, абур чпи доскадал экъечIиз гьялзавай. Кьиляй-кьилиз а юкъуз кружокдин кIвалахда иштираквал авур зун, аялар хьиз, анай чина разивилин нур аваз, гележегда чи аялрин арадай 27 йисан яшда аваз илимрин докторвилин тIварциз лайихлу хьанвай чи баркаллу районэгьли Заур Алисултанов хьтин кьегьал рухваяр ва рушар мадни акъатдайдахъ инанмишвилин умудар рикIе аваз классдай экъечIна. Мадни са кар къейд ийиз кIанзава: аялри и кружокда кIелун пулсуз я. И юкъуз пакамахъай кружокдин кIвалах кьиле физвай гьал ахтармишиз Махачкъаладай адаз къаюмвал ийизвай «Умуд» («Надежда») алава образованидин центрадин векил Аскер Аскеровни атанвай. Тарс башламишдалди вилик анал рахай пешекарди чпин центрдин гележегдин планрикай- ни куьруь суьгьбет авуна, кружокда чирвилер къачузвай аялрин, руковдитель М.А.Шерифован тIварцихъ хуш келимаяр лагьана, кIвалах тешкилнавай гьалдикай вичин разивал къалурна. Абидин Камилов. Шикилда М.А. Шерифов.